أنواع فيروس سي و تقسيماته

أنواع فيروس سى

النوع الجينى (Genotype): دى الأنواع الرئيسية للفيروس وبيبقى لها أرقام 1، 2 ، 3 وهكذا والمكتشف حتى الآن 11 نوع منها
النوع الفرعى (Subtypes): وكل نوع جينى بينقسم لعدة أنواع فرعية وبتاخد حروف أ، ب، وهكذا، والمكتشف حتى الآن 50 نوع منها
النوع الظاهرى (Quasispecies): وكل نوع فرعى فيه كذا نوع ظاهرى .. والنوع ده العدد منه فى اللمون.

ماتتعقدوش ، احنا لسه هنبسط الموضوع ..

تعالوا نتخيل أن فصائل الفيروسات بأنواعها المختلفة مثل أنواع الطيور الموجودة فى الدنيا، فمثلاً فيه العصافير ودى يمثلها فيروس الانفلونزا، بينما فيه الطيور الجارحة ودى يمثلها فيروس سى.

الطيور الجارحة أنواع ، ففيه النسر والصقر والحداية والغراب وهكذا .. وكل واحد من دول بيمثل النوع الجينى Genotype لفيروس سى
والنسور نفسها فيه منها أنواع فهناك النسر الأمريكى الأقرع ، والنسر الأسترالى ، ونسر البحر وهكذا ، ودى الأنواع الفرعية Subtypes لفيروس سى
والنسر الأمريكى الأقرع نفسه فيوجد فيه منه فصائل تختلف اختلافات طفيفة فيما بينها مثلاً من حيث طول الرقبة ، ومدى الجناحين، لون الصلعة ، ودى بقى اللى هى الأنواع الظاهرية أو الـ quasispecies لفيروس سى. والأنواع الظاهرية دى هى مشكلة المشاكل فى مرضى فيروس سى زى ما هنحكى بعدين.

التوزيع الجغرافى للأنواع المختلفة من فيروس سى:

- - 1a : أمريكا الشمالية والجنوبية وأوربا
  - 1b: أوربا وآسيا
  - 2a: اليابان والصين
  - 2b: أمريكا وشمال أوربا
  - 2c : غرب وجنوب أوربا
  - 3a : أستراليا وجنوب آسيا
  - 4a : ده بتاع مصر
  - 4c : وسط أفريقيا
  - 5a : جنوب أفريقيا
  - 6a: هونج كونج وفيتنام
  - 7a & 7b: تايلاند
  - 8a, 8b & 9a: فيتنام
  - 10a & 11a: أندونيسيا
  </li>
</li>

كيف يمكن تحديد هذه الأنواع؟

توجد اختبارات معملية لتحديد النوع الجينى والنوع الفرعى ، أما تحديد النوع الظاهرى فهو مقصور على معامل الأبحاث وغير متاح فى المعامل التجارية.

هل يلزم اجراء هذه الاختبارات لمعرفة ضرورة العلاج؟
لا، فطالما الفيروس موجود أياً كان نوعه فهو صالح للعلاج ، ولكن اجراء هذه الاختبارات يتم لتحديد كيفية العلاج، فالنوع الثانى والثالث مثلاً يكفيها علاج لمدة 6 أشهر ويأتى بأحسن النتائج بينما النوع الأول والرابع يلزم علاجه لفترة 12 شهر. وفى أمريكا وأوربا يجرون هذا الاختبار قبل بدء العلاج لهذا الغرض ، أما فى مصر فلا يتم اجراءه روتينياً على اعتبار أن النوع الشائع لدينا هو النوع الرابع ، بالرغم من أنه تم رصد حالات من الأنواع الأخرى فى مصر.

هل يمكن أن يصاب الشخص بأكثر من نوع؟
اذا دخل نوع جينى من الفيروس إلى الجسم ، هيبقى هو النوع الوحيد المسبب للعدوى ، ومش ممكن يتغير (النسر مش هيبقى غراب) وبرضه النوع الفرعى نفس الكلام .. يعنى المريض اللى يصاب بفيروس سى 4a يبقى هيخليه 4a على طول ومش هيتغير. لكن لو المريض ده منحوس بدرجة كافية واتعرض بعد شوية للإصابة من مصدر آخر بنوع آخر وليكن 3b، فالجسم هيقول له أهلا وسهلاً وهيبقى صاحبنا عنده 4a و 3b فى نفس الوقت.

هل هناك علاقة بين النوع الجينى وسرعة تطور المرض إلى تليف؟

كانت هذه النقطة محور جدل وتضارب ولكن تم حسمها فى دراست عديدة بأنه لا توجد علاقة بين النوع الجينى وتطور المرض.

ماذا عن استجابة الأنواع الجينية المختلفة للعلاج؟

أحسن استجابة بتكون فى النوع الثانى والثالث ، وأقل أستجابة بتكون فى النوع الأول. أمــا النوع الرابع اللى منتشر فى مصر فإستجابته للعلاج بتقع فى موقع متوسط بين الحالتين ، يعنى بيبقى أحسن شوية من أستجابة النوع الأول.
ويكون العلاج بالانترفيرون والريبافيرين لمدة سنة فى النوع الأول والرابع بجرعة ريبافيرين حسب الوزن.
أما فى النوع الثانى والثالث فيكن العلاج لمدة 6 أشهر بجرعة ريبافيرين ثابتة قدرها 800 ميلليجرام يومياً.

نيجى بقى لمشكلة المشاكل واللى مخلية فيروس سى عامل القلق ده كله ، وهى الأنواع الظاهرية ، فالفيروس يتكاثر فى جسم المريض بعدل تريليون نسخة كل يوم والتركيب الوراثى لفيروس سى بيخلى من الوارد جداً ان يحصل خلل فى عملية التكاثر فتظهر سلالات برقبة طويلة وأخرى برقبة قصيرة ، وسلالات بصلعة بيضا وأخر بصلعة فضى وهكذا، فهتلاقى المريض الواحد عنده آلاف الأنواع الظاهرية من فيروس سى ، ودى عاملة مشكلة من كذا شق.

الشق الأول : بتسبب صعوبة تخلص الجهاز المناعى من الفيروس ، فالخلايا المناعية بتاخد نسخة من الفيروس وتفصل سلاح على مقاسها وتنشر السلاح ده فى الجسم للقضاء على الفيروس ، بس يا فرحتى ، على ما السلاح ده يخلص على النوع اللى متفصل عليه ، هيكون ميت نوع تانى اتولدوا، وهكذا ندور فى حلقة مفرغة والنتيجة أن يصبح الفيروس مزمن فى الجسم العاجز عن التخلص منه.
الشق الثانى: وده نفس فكرة الشق الأول ، مافيش مصل للتطعيم ضد فيروس سى لنفس الأسباب. فحتى لو تم تجميع كافة الأنواع الظاهرية الموجودة جدلاً وعمل مصل لها، فالأنواع الجديدة اللى هتظهر بكره بتكون وحيدة من نوعها ومالهاش مثيل قبل كده.
الشق الثالث: كثرة الأنواع الظاهرية بتزود فرصة عدم الإستجابة للعلاج (أى علاج)، يعنى العلاج اللى يقدر يقضى على ألف نوع ظاهرى مثلاً عند أحد المرضى ، هيلاقى صعوبة أكتر فى القضاء على عشرة آلاف نوع ظاهرى عند مريض آخر. ومن الحاجات اللى بتساهم فى زيادة الأنواع الظاهرية هى المدة الزمنية للإصابة بالفيروس ، فكلما زادت تلك المدة ، كلما أتيح للفيروس الفرصة فى انتاج أنواع ظاهرية أكثر ، عشان كده مرضى الالتهاب الكبدى الفيروسى الحاد (يعنى الحديث اللى عمره شهور) بتكون استجابتهم للعلاج بالانترفيرون 100% عشان الفيروس مالحقش يجدر فى الجسم وينشر أنواع ظاهرية كثيرة. وللسبب ده أنا من أنصار العلاج المبكر لفيروس سى حتى لو كانت الإنزيمات طبيعية وحالة الكبد ممتازة لأن الأنواع الظاهرية النهاردة أقل من بتاعة بكره فهتبقى فرصة الشفاء النهاردة أحسن من بكره.

</blockquote>

الله يكون فى عون المصريين من الطينه الجميله المليئه

بجميع انواع الفيروسات التى لم تورد فى اى بلد فى العالم

يااختى هيه جت على الفيروسات دا فيه حاجات تانيه كتير

الله المستــــــــــــــــــــــــــــــــــــــــــــعان ربنا يقبضنا على طاعه

دى اهم حاجه .......................بارك الله فيكى اختى موضوعاتك ديما مميزه

هههههههههههه
بارك الله فيك وقبضنا على طاعته امين

» طريقة ازالة فيروس اوتو رن بدون برامج
» زهقت من فرمتة الجهاز بسبب عيوب فيه (بطئ-فيروس-مش شغاال)...ريح دماغك بـ 10 خطوات فقط